Gintiro kag napatay ang isa ka American national nga marine scientist sa Purok 3, Barangay Ajong sa banwa sang Sibulan, Negros Oriental sadtog Domingo sang gab-i, Hulyo 12.
Tatlo ka mga lalaki nga nakasuksok sang bonnet ang nagsulod sa balay sang 73-anyos nga biktima nga ginkilala kay Dr. Kent Edward Carpenter gikan sa Virginia, USA.
Isa sa mga suspek nga may pusil ang nagtiro sa ulo sang biktima, nga naga lantaw sang TV upod ang 34-anyos nga babaye.
Nakaangkon naman sang pilas ang Pinay matapos ginhigtan sang mga suspek ang iya kamot kag tiil sang cord.
Agud matutokan ang imbestigasyon, nagtukod ang Police Regional Office-Negros Island Region sang Special Investigation Task Group nga ginalakipan sang mga imbestigator kag iban pa nga specialized units.
Ginakasubo kag nagapanawagan sang hustisya ang Protect the Verde Island Passage sa kamatayon sang biktima, nga isa ka marine biologist kag university professor.
Ang Protect VIP isa ka network sang civil society kag faith-based groups nga naga-ugyon agud pangapinan ang dunang manggad ilabi na ang pag-preserve sang Verde Island Passage, ang strait nga nagaseparar sa mga isla sang Luzon kag Mindoro.
Suno sa grupo, dako ang nangin papel ni Dr. Carpenter agud makilala ang Verde Island Passage bilang “Center of the Center of Marine Shorefish Biodiversity” kag agud pangapinan ang marine biodiversity sang Pilipinas humalin pa sang 1970s.
[sibwp_form id=1]