Patay ang 21-anyos kag residente sang banwa sang Maria sa probinsya sang Siquijor matapos nga gintiro sa National Highway sakop sang Barangay Balintawak siudad sang Escalante, Domingo sang hapon.
Suno kay Police Major John Ganzon, hepe sang Escalante City Police Station, isa ka engine cadet operator sang EB Aznar Shipping Corporation sa Cebu ang biktima nga ginkilala kay Alfredo Sumaylo.
Sa inisyal nga imbestigasyon sang mga kapulisan, sa pagpana-og ni Sumaylo sa tricycle, hinali ini siya ginla-ot sang wala pa makilal-an nga suspetsado kag gintiro sang makapila ka beses.
Naigo sang bala sa likod kag ulo ang biktima nga gintunaan sang iya kamatayon.
Nakuha sa crime scene ang isa ka deformed slug, tatlo ka basiyo sang caliber .40 kag isa ka bala.
Dugang pa ni PMaj. Ganzon, gilayon nga nagdalagan ang suspetsado, nga ginapatihan nagpadulong sa iya motorsiklo nga nakapark sa unhan kag nagpalagyo padulong sa Toboso.
Padayon ang imbestigasyon sang mga kapulisan kun ngaa yara sa siudad ang biktima, kag kun ano ang motibo sa krimen.