Gindakop sang katapo sang Police Station 7 ang 56-anyos nga lalaki sa buy-bust operation matapos makuhaan sang P40,000 nga balor sang suspected shabu sa Purok Encarnacion sa Barangay Mansilingan, Bacolod City.
Ang suspek nga ginkilala kay alyas “Rey”, amo ang ginatudlo nga nagbuno sa American national sa gwa sang convenience store sa Barangay Mansilingan, Bacolod, sang Domingo, Mayo 24.
Positibo siya nga ginkilala sang biktima kag nobya sini paagi sa Rogues’ Gallery sang kapulisan.
Ginsiling ni Police Capt. Jay-r Reyes, hepe sang Station 7, nga may mga daan na nga kaso ang suspek, lakip na ang sa iligal nga droga kag alarm and scandal. Naga-ako man ang suspek nga nagagamit ini sang iligal nga droga.
Madumduman nga nakuhaan sang closed-circuit television camera footages ang pagpalapit ni alyas “Rey” sa dumuluong nga nagapungko sa gwa sang convenience store.
Suno kay alyas “Rea”, fiancée sang Amerikano, nagtanyag ang suspek sang proteksyon, kabaylo nga bayaran siya. Apang sang nagpamalibad ang dumuluong, didto na nag-gabot sang kutsilyo ang suspek kag ginbuno ang biktima.
Maswerte na lang nga nakadalagan kag wala matam-an ang American national.*
[sibwp_form id=1]