Nag-inabot na kaina ang supply sang bugas halin sa National Food Authority nga natalana ibaligya sang Bacolod LGU sa tag-P20 per kilo sumugod bwas.
Command Center italana nga storage area para sa supply sang bugas nga ibaligya sa P20 per kilo sa Bacolod.
Ang roll out ang pangunahan ni Agriculture Secretary Francisco Laurel, Jr., upod sa city officials sa Burgos Public Market. Ginsiling ni Secretary to the Mayor Atty. Jose Marty Go nga magluwas sa Libertad kag Central Market natalana nga ibaligya ang supply sang bugas sa tag-P20 per kilo sa mga clustered barangays.
Kada adlaw indi magnubo sa 400 ka sako sang bugas ang iga-deliver sang NFA paagi sa Food Terminal Incorporated gani gintalana sang siudad ang Command Center nga mangin storage area para sa supply sang bugas.
Mga katapo sang indigent families, senior citizen, person with disability kag vulnerable sector ang prayoridad sang ginapatuman nga food security program sang national government.
Gani nagpahanumdom si Go nga dapat magdala sang valid IDs ang mga beneficiaries para makabakal sang bugas.
Limitado sa napulo ka kilo nga bugas kada semana ang sarang mabakal sang mga benepisyaryo.
Kapin sa P7.7M nga financial subsidy ang gintalana nga pondo sang LGU para masobra 5,800 ka sako sang igabaligya nga bugas.