Isa sa ginatan-aw nga kabangdanan sang pagka-atrasar sang operasyon sa pagkolekta sang basura amo ang pagdamo sang mga “prank call” nga ginabaton sang Bacolod Environment and Natural Resources Office ukon BENRO.
Ini ang suno kay City Administrator Atty. Mark Mayo. Dugang pa niya, sa tagsa ka reklamo nga ginatawag sa command center sang BENRO, ginahimo anay ang pag-usisa agud makumpirma kun ini lehitimo antes magpadala sang mga truck kag personnel.
Apang madamo, suno sa iya, ang naga-tawag nga wala sing matuod nga reklamo naga tuga lang sang pagka delay sang paghakot sang basura.
Ginsiling man ni Mayo nga ang amo nga sitwasyon nagaapekto sa operasyon sang BENRO, ilabi na sa pagbaton sang mga lehitimo nga reklamo gikan sa publiko.
Ginpangabay niya ang paghangup sang mga pumuluyo kon may mga tawag nga indi dayon masabat, kag ginpasiguro nga ginahimo sang siudad ang tanan nga tikang agud maaksyonan ang mga reklamo.*