Naglinupok ang mga palupok nga nakatago sa storage room sang isa ka balay sa Purok Tuway, Barangay Canmoros sa banwa sang Binalbagan, Negros Occidental pasado las 7 kagab-i.
Nagapanyapon ang mag-asawa nga tag-iya sang balay sang gulpi lang may nabatian sila nga paglinupok.
Ginsiling ni Fire Officer 1 Exxon Ylosorio, fire arson investigator sang Binalbagan Bureau of Fire Protection, gilayon nga natapna ang sunog sa storage room kag wala na naglapta ang kalayo sa iban nga parte sang balay.
Ang mga firecrackers nga nasunog, amo ang mga wala pa maubos gamit sang tinalikdan nga tuig kag gintago sa nasambit nga stockroom.
Wala sang may nasamaran sa insidente.
Sa karon, padayon ang imbestigasyon sa gintunaan sang kalayo.
Nagapanugyan ang BFP sa publiko sini nga holiday season nga likawan ang pagbakal sang mga palupok.*