Isa ka consultation meeting may kaangtanan sa pag patuman sang NIR Act ang ginpatigayon kahapon sang tunga sang mga opisyales sang Department of Health upod kay Negros Occidental Governor Eugenio Jose Lacson.
Suno kay USec Mary Ann Maestral sang DOH na plastar na ang personnel para sa DOH-NIR kag ini ang naga hulat na lamang sang lagda ni DOH Sec Teodoro Herbosa.
Isa sa mga gina lantaw nga palaabuton nga proyekto sang DOH-NIR amo ang mental facility labi na nga wala sang kasubong nga pasilidad sa probinsya.
Isa man ini sa gintalakay kag maga bulig pangita ang probinsya sang duta para diri suno kay Maestral bangud may available man nga iban nga resources para diri ang DOH.
Ang DOH-NIR nga talatapan ang yara sa Negros Oriental pero may talatapan man nga ginhatag ang Negros Occidental kag Bacolod para sa ila suno kay Maestral.
Yara man sa pagsinapol ang mga tiglawas kag key officials sang DOH sa Management Support Cluster kag administrative and Management Services, upod si Regional Director Razel Nikka Hao.
“Amo na ang dream nga may mental hospital ang Negros Occidental, so we’re trying to coordinate with the province. Kay DOH has the money and the capacity to build and run such facility pero wala kami duta. Depende kay mangita si Gov sang lugar kun diin naton pwede and of course nagapasalamat kami kay naghatag si Gov sang office space dira sa Negros Residences”, suno kay Maestral.