Personal nga ginbisita ni Bacolod City Mayor Greg Gasataya kaupod ang iban pa gid nga mga opisyal ang Sanitary Landfill sang Bacolod City sa Barangay Felisa kaina sang aga.
Suno kay Gasataya, ginpatigayon ang inspeksyon agud masiguro nga indi matabo sa Bacolod ang natabo sa sanitary landfill sang Cebu City sadtong Enero 8. Dugang pa niya nga dako na ang ginbag-o sang sanitary landfill, ilabi na sa pagnubo sang kataason sang halabuyan sang basura kag sa paglapad sang alagyan.
Suno naman kay Mario Sandil, ang Operations Manager sang ISWIMS, gina tabunan nila sang volcanic soil ang basura kag gina-compact ini pinaagi sa compactor agud mapahugot kag mapabakod.
Iya man ginsiling nga sa 280 nila ka mga emplayado 90 porsyento diri ang residente sang Bacolod.
Dugang pa ni Sandil, ang cell no. 5, ang inugdugang nga area sa landfill, may budget nga P65 milyon kag may kalaparon nga duha ka ektarya.
Iya man ginpahayag nga magabuho sila sang 10 meters ang kadalumon bilang kabahin sang preparasyon sang bag-o nga cell.*