Digicast Negros

Senior citizens nga mapabakuna nagdagsa sa mall

Isa sa mga nagpila sa vaccination center sang Bacolod sa SM City mall ang 71 anyos nga si Jun King.

Suno sa iya, ginhaylo siya sang iya pamilya nga magpabakuna kontra Covid-19 agud ma proteksyunan ang bilog nila nga pamilya sa makalatagam nga epekto sang virus.

“Kay ang mga kabataan ko nagpabakuna na una ti gina encourage nila ko nga magpabakuna man,” suno kay King.

Luyag naman sang 70 anyos nga si Teresita Carnaje nga magpabakuna para mahim-os siya kag mapasiguro nga may resistensya ang iya lawas batuk sa virus.

“Para daw may peace of mind of man bala nga indi ta malatnan,” suno kay Carnaje.

Ginkakibot ni Bacolod Emergency Operations Center executive director Em Ang ang pagdagsa sang madamo nga senior citizens subong nga adlaw.

Sa una nga adlaw sang vaccination center kahapon, 200 lang kuntani ang target nga mabakunahan pero nagsobra sila sa target.

Suno kay Ang, nagapakita ini nga madamo na ang nagapati sa pagpabakuna kontra Covid-19.

Ginahatagan sang petsa kun san o makapadulong sa vaccination center ang mga damlag pa nakaparehistro na nga mga senior citizens kag persona nga may mga balatian.

Indi kuntani mag accommodate sang walk ins pero bangud sang pagdagsa sang mga luyag magpabakuna nagbutang ang EOC sang waiting list pero sarang lamang sila mahatagan sang bakuna kun naubos na ang mga nakaparehistro sa amo nga adlaw kag kun may bilin pa nga bakuna.

Exit mobile version
Skip to toolbar