Yara sa driver’s seat kag duguon ang nawong sang biktima nga si alyas “Luing”, 67-anyos, residente sang Barangay Zone V sa Murcia. Siya ang anay kapitan sang Brgy. V kag anay ABC president.
Imbolbado sa insidente ang Toyota Wigo ni alyas “Luing” kag isa ka Honda Beat nga motor, ginamaneho ni alyas “Papat”, 30-anyos, residente sang Barangay Patag sa Silay City.
Nag-gwa sa imbestigasyon nga pareho nagapadulong sa proper sang Murcia ang duha sang nag-overtake ang motorsiklo kag ginbalabagan ang awto. Didto na nanaug ang motorcycle rider, ginbutong kag gintapungol sang makapila ka beses ang driver sang Wigo, nga nagresulta sa mga pilas sa iya nawong.
Gin-alegar sang suspek nga diutayan lang siya mabungguan sang Wigo. Wala man siya sang pilas ugaling suno sa iya, wala niya mapunggan ang iya kainit, rason nga ginlagas niya ang awto.
Ginsiling ni Police Captain Honey Labaro, hepe sang Murcia PNP, subong nga adlaw natalana nga i-file ang kaso nga physical injury batok sa motorcycle rider.
Samtang, natalana nga magpapanaug sang show cause order ang Land Transportation Office-Negros Island Region batok sa rider agud makapaathag kun ngaa indi dapat pag i-suspend, i-revoke ukon siya ang paga-penahan bangud sang iya involvement sa nasambit nga road rage.
“Indi ta magpadala sa init sang ulo kay indi kita makadesisyon sang tadlong kun naga-init ang aton ulo. Much better kon wala ka gid man na ano, pakalmahan mo na lang imo pinsar kag i-report niyo sa amon para indi na madugangan ang problema. Kalma ta kay kabudlay gapadala ta sa init sang ulo, wala ta na ginalantaw ang konsekwensya nga matabo”, suno kay Labaro.*
[sibwp_form id=1]