Patay ang senior citizen nga tricycle driver matapos gintiro sang tatlo ka mga armado sa Barangay General Luna sa banwa sang Toboso kaina, Martes sang kaagahon.
Yara sa sulod sang iya puluy-an ang 64-anyos nga biktima sang ginsulod kag gintiro sang makapila ka beses.
Suno sa Toboso PNP, wala sang may nakakilala sa mga suspek sa lugar bangud nagasuksok sila sang bonnet kag kalo.
Narekober sa crime scene ang anum ka basiyo sang 9mm.
Wala naman sang ano man nga kaso ang biktima suno pa sa Toboso PNP.
Gin-ako naman sang Roselyn Jean Pelle Command-New People’s Army nga ila ginsilutan ang biktima nga ginkilala kay alias Eboy.
Gin-alegar sang rebelde nga grupo nga si Eboy ang isa sa nag guide sa mga soldado agud i-raid ang mga hangaway sang NPA sadtong Marso 18.
Ginsiling ni Police Captain Judesses Catalogo, spokesperson sang Negros Occidental Police Provincial Office, nga makabig nga senseless killing kag wala sang respeto sa kinamatarong sang tawo kung sila ang pamatyon dayon kag indi paghatagan sang nagakaigo nga due process.
Suno kay Catalogo, kun may sala ang tawo, gina-imbestigaran ini sang kapulisan, ginatipon ang ebidensya kag ginapasakaan sang kaso agud masabat sa nagakaigo nga Korte kung ano man ang alegasyon batuk sa iya.