Iya ginpatpat ang mangin papel sang LGU sa idalom sang amo nga programa kun sa diin, sarang na mapaagi sa LGU ang pag patukod sang mga classrooms.
Sa ini nga pamaagi, mas barato kag mas madasig ang pag obra. P67.8 billion ang gin pain nga pondo para sa pag patukod sang 25,000 tubtob 30,000 ka mga hulot klasehan sini nga 2026 suno sa iya.
Si Aquino nga senate committee chair on education,nag paathag nga ini ang kabahin sang iya tikang nga ginduso para amat-amat nga malubad ang 166,000 ka kakulang sang mga classrooms sa bilog nga pungsod humalin pa sang nagliligad nga tinuig.
Sadto anay nag gamay na ang ini nga gap kag napapanaog sa 10,000 na lamang ang kakulang sa classrooms sang 2016-2017, pero liwat ini nga nag daku.
Sang 2025, 99 lamang ka mga classroom ang tigayon nga natukod sang DPWH suno sa senador.
Sa idalom sang liderato ni Sec Vince Dizon, nagsaad ang DPWH suno kay Aquino nga mag pa tukod sang 3,000 classrooms karon. Ini ang gikan pa sa ila 2024-2025 nga budget.
Suno kay Aquino, sa masunod nga mga semana ginapaabot ang pag roll out sang first tranche sang P67.8 billion nga pondo para diri sa mga LGU.
Indi niya pa mapat-od kun pila gid ang pondo para sa Negros, pero suno sa iya nalakip ang Negros sa mga ginapaabot patukuron nga mga classrooms.*
[sibwp_form id=1]