Senador Juan Miguel Zubiri ang maga present bwas nga adlaw kay Presidente Ferdinand Marcos, Jr., sang resulta sang pagsapol niya sa mga gobernador kag bise gobernador sang Negros Occidental, Oriental kag Siquijor angut sa Negros Island Region.
Suno kay Governor Eugenio Jose Lacson, nga nagtambong sa meeting kahapon kay Zubiri, naghilisugot na ang tatlo ka mga gobernador para sa NIR ukon may yara na sang “meeting of the minds”.
Sa ila nga paghangup, nakahibalo ang presidente sa amo nga pag sinapol kag kun may paghilisugot na sa tatlo ka lideres sang mga natungdan nga probinsya, matigayon gid ang Negros Island Region. Ginapaabot ang committee hearing bahin sa senado para diri kag tinutuyo nga sa Disyembre, suno kay Lacson, sa senate level mapasar ang NIR.
Ginkasugtan man sang kahapon suno kay Lacson nga kun ano ang nangin sistema sang nagligad nga NIR ini ang paga sundon. Ang mga regional offices ukon centers sang mga government agencies nga na partenesir sadto sa Occidental kag Oriental amo sa gihapon ang sundon.
Indi pa masiguro ni Lacson kun may yara man para sa Siquijor. Wala natalakay ang budget, pero gina lantaw ang phase by phase nga pag plastar sang mga regional offices kay kun tingbon masyado naman ka daku sang budget nga kinahanglan.