Indi malipod nga may mga kaso sang nagakadula kag missing ang mga dokumento sang mga aplikante nga naga transakyon sa mga opisina sang Bacolod City Government Center.
Bilang resulta naga ka delay kag indi man gilayon ma proseso sang mga aplikante ang ila mga requirements.
Kabahin ini sa mga problema nga sarang masolusyunan paagi sa data tracking system sa idalom sang e-govenance system sa Bacolod City Government Center.
Kaina ginsuguran na sang Management Information Technology Computer Services ang seminar upod sa mga department heads para masuguran ang pagpatuman sang sistema sa madasun nga binulan.
Suno kay Ramon De los Reyes, OIC sang MITCS, pinaagi sa data tracking system ginalauman nga mas mangin transparent kag accountable ang mga government employee sa pagproseso sang mga dokumento sa siudad.