Gin tublag sang madugo nga krimen kaina sang aga sa Uybico Bilbao Senior High School sa Baran0gay Pooc banwa sang Hinobaan matapos gin tiro sang principal sang eskwelahan ang iya babayi nga manunudlo pati ang bana sini antes sini gin utas man ang iya kabuhi.
Sa imbestigasyon sang Hinobaan PNP, nagpanaog gikan sa iya pickup ang principal nga si Warren Escosar kag may dala nga duha ka armas.
Iya gin tiro ang magasawa kag iya una naigu ang mister nga si Christopher Arroy nga pakadto na kun tani sa ila nga motor.
Nag palagyo ang iya misis nga manunudlo nga si Almarisa kag nag tago sa isa ka classroom apang siya ang gin lagas kag didto gin luthang ni Escosar.
Lunsay patay ang mag asawa. Matapos ang gin ubra nga krimen, ang principal ang nagkuha sang isa pa ka armas sa iya nga salakyan kag iya man gintiro ang iya kaugalingon.
Ginahibalo pa karon sang PNP ang motibo sang krimen.
Samtang, gin pahayag naman ni Hinobaan Mayor Ernesto Estrao nga siya ang naka baton sang impormasyon nga may kaakig ang principal sa manunudlo bangud sa iya gin reklamo sa Office of the President. Ila man hibaluon pa kun ano ang kaundan sang reklamo sang maestra.