Indi tanan nga mga bubon kag bomba kag iban pa nga water sources ang malab ot kag ma-inspeksyon sang katapo sang Environmental Sanitation Division sang City Health Office karon nga nagasaka ang kaso sang cholera sa Bacolod.
Ang CHO ang padayon nga naga validate sang ika napulo nga cholera case sa Barangay Handumanan.
Gani agud mas mapabaskog ang tikang kontra sa cholera, ilabi na sa bahin sang chlorination sa mga open wells kag mga bomba, ginaduso sang katapo sang Liga ng mga Barangay ang pagtalana sang sanitary inspector sa kada barangay.
Suno kay Lady Gles Gonzales – Pallen, president sang Association of barangay captains sa siudad, mas mapadasig ang pag usisa sang mga water sources nga sarang halinan sang cholera.
Magasapol man ang mga punong barangay upod sa city health officials karon nga hapon agud mapasanyug pa ang ihibalo batuk sa cholera sa mga kabarangayan.