Ginparahan sang katapo sang Bago City Police Station ang puti nga Toyota Revo sa isa ka checkpoint operation sa national highway, Rafael Salas Drive sa Barangay Balingasag sa Bago City, pasado las 2:45 sang Hwebes sang kaagahon.
Apang, imbes nga magpondo, nagdasig pa gid ang pagpadalagan sang driver sang salakyan kag nagpalagyo.
Nagpatigayon sang hot-pursuit operation ang kapulisan kag na-intercept ang salakyan sa highway sang Barangay Pacol sa Bago City.
Sakay sa salakyan ang mag-asawa nga taga Binalbagan. Sila ang halin Bacolod City kag padulong sur sang Negros Occidental.
Suno sa Bago PNP, napaslawan ang driver nga magpakita sang valid nga lisensya kag dokumento sang salakyan.
May nakit-an man ang mga pulis nga mga karton sa sulod sang salakyan kag gin-ako sang mag-asawa nga may unod ini nga mga sigarilyo.
Nakuha sa ila ang 23 ka boxes sang iligal nga sigarilyo, ginabulubanta nagabalor P460,000.
Detained karon sa Bago PNP ang mag-asawa kag kaso nga disobedience to person in authority ang ipasaka batok sa ila bangud sang ila pagpalagyo sa checkpoint.
Ginsiling ni Police Lt. Col. James Latayon Jr., hepe sang Bago PNP nga maga-coordinate sila sa Bureau of Internal Revenue angot sa disposition sang mga smuggled cigarettes.
“Wala pa rin. Sige-sige ang mga ito, wala gid naga-ako kung diin halin pero Bacolod lang naman… Going south, indi pa namin malaman kung saan sila pero mostly going south, ginapa-check ko pa kay taga-Binalbagan sila. Actually may ginabagsakan man gid sila sa Binalbagan”, suno kay Latayon.*
[sibwp_form id=1]