Nadayon ang pagpanguisa sang Finance Committee sang konseho sang Sagay angut sa 7.3 million pesos nga health emergency allowance nga wala ma-release sa mga frontliners.
Suno kay Vice Mayor Leo Rafael Cueva nadayon ang pagsinapol sang komitiba nga gina pamunuan ni Councilor Laura Javelosa kay City Treasurer, Juvy Pinongan.
Suno kay Cueva maga himo sang report ang komitiba angut diri kag ini ang iga report sa madason nga session sang konseho.
Ang City Legal Office sang Sagay ang nagapatigayon sang imbestigasyon matapos nga nag padangat sang reklamo kay Mayor Narciso Javelosa, Jr., ang mga duktor kag nurse nga wala makabaton sang ila nga HEA apesar nga nag abot na ang pondo gikan sa Department of Health.
Suno sa alkalde ginsiling ni Pinongan nga masako siya kag gina reconcile pa niya ang records rason nga wala ma release ang nabilin nga 7.3 million gikan sa kabilugan nga 22 million pesos nga pondo.
Naga pabilin na man nga naka seal ang vault sang City Treasurer’s Office.
Ginsiling ni Pinongan suno sa alkalde nga indi niya mabuksan ang vault bangud nga nalipatan niya ang number combination.
“Ang ginhimo subong nga aga sang Committee on Finance nag meeting kaina with our treasurer so ang aton Committee on Finance will make a report sa next session”, suno kay Cueva.