Temporaryo nga indi pagpalabyan ang porsyon sang dalan sa Rosario-Araneta pakadto sa Rosario-San Juan sumugod sini nga Lunes sang gab-i bangud sa ipatuman nga pagkaayo sang dalan.
Naga abiso ang Bacolod City Transport and Traffic Management Department ukon BTTMD sa mga motorista nga kun mahimo likawan anay ang paglabay sa sini nga dalan agud makalikaw man sa pag guot sang salakyan.
Ginsiling ni Bacolod City Mayor Greg Gasataya nga subong nga adlaw magasugod ang pag-construct sang dalan kag magalawig ini sang anum ka bulan.
Dugang niya, ini ang isa sa pinakaguba nga dalan sa siudad kag may pila na ka dekada nga wala makaayo.
Ginatinguhaan pa sang BTTMD nga mapangitaan sang paagi ang paglabay sang mga salakyan sa area, ilabi na ang mga Public Utility Jeepneys nga may ruta nga Punta Taytay-Central Market.
Sa karun, may ginpagwa na nga re-routing scheme ang siudad. Kada las 6 tubtob las 8 sang aga ang mga jeep nga nagabyahe Punta Taytay nga nagalabay sa San Juan ang maliko na sa San Sebastian padulong sa dalan Araneta.
Samtang sumugod las 8 sang aga, gikan sa San Juan ma right turn na sa Rosario Street, left turn sa MV Berueda Street kag balik sa Araneta Avenue.
Ginaabisohan man ang mga truck nga ginadumilian anay ang paglabay sa dalan Araneta.
Sa karun, padayun pa nga gina mapping sang BTTMD ang area agud makapatuman sang mas matawhay nga re-routing scheme sa mga motorista.
[sibwp_form id=1]