FIACN BRIS photo
Dala sang gina atubang nga pag panghangkat sang ginapaabot nga El Niño, mga rice farmers sakop sang Bago River Irrigation System ukon BRIS ang naga laum sang pat-od nga schedule sa water delivery and distribution.
Mga mangunguma nga sakop sang southern district sang BRIS ang naga panghanda na karon para sa bag-o naman nga cropping.
Suno kay Pedro Limpangog ang presidente sang Federation of Irrigators Association Central Negros – Bago River Irrigation System ukon FIACN-BRIS, mga mangunguma nga katapo sang irrigators association gikan sa Valladolid, Pulupandan, La Carlota kag San Enrique ang naga patuman na sang land preparation para makatanom. Mayo 1 pa nag bukas ang irigasyon sa ila.
Sa northern district naman suno kay Limpangog patapos ang ani kag sa June 15 naman maga sugod sa bag-o nga cropping.
Bisan pa nga may gina paabot nga El Niño, naga laum sila nga kun may na plastar nga schedule para sa water delivery, tigayon sila makatibawas. September to November sini nga tuig gina paabot ang weak El Niño.
“Ang importante lang da ya ang pag partida sang tubig sa intsakto, kay kun wala sang maayo nga partidahay sa tubi kulangon ang tubi, pero kun naga istorya ang mga mangunguma, ang intsakto nga water delivery kag water distribution indi gid siguro kahangawa sina”, suno kay Limpangog.
Indi mag nubo sa karon ang produce ukon na ani sa kada ektarya sa lima ka tonelada bisan pa nagsugod na batyag ang pananom sang kainiton.
May mga naga lab-ot gani suno sa iya sa 6 tons per hectare nga amo ang target nga ma produce sang probinsya.
“Makit-an naton nga ang produkto, ang ani sang mangunguma diri, nagalab-ot gani 6 tons/hectare ang iban”, suno kay Limpangog.
Nag barato sa P23 to 24 pesos per kilo ang lagtong nga humay karon gikan sa sadto anay P28 to 29 per kilo. Pero, sa P23 to 24 nga presyo may ginansya pa man ang mangunguma suno kay Limpangog. Mahimo nga ang pag barato, epekto man sang imported nga bugas sa merkado.
[sibwp_form id=1]