Base sa report sang Department of Agriculture Negros Island Region, may gin-report nga rice black bug infestation sa Maslog, Sibulan, Negros Oriental.
Ginkadtuan sang DA-NIR ang area sang kahapon.
Suno kay Bernard Limbaga, Agricultural Program Coordinating Officer sang Negros Oriental, base sa ila aktwal nga inspeksyon sa humayan, indi seryoso ang infestation sang rice black bug gani wala sang dapat kabalak-an bangud kontrolado man ang sitwasyon.
Base sa mga nakolekta nga datus, isa lang ukon duha ka rice black bug ang nakita halin sa kinse ka samples nga nagalakip sang 1.5 ektarya nga talamnan.
Nagpasalamat si Porferio Ejercito, isa ka seed grower kag tag-iya sang duta bangud gilayon nga ginkadtuan sang DA-NIR ang iya nga lugar.
Nagapanawagan naman ang DA-NIR sa tanan nga mga mangunguma nga mangin mabinantayon kag gilayon i-report sa ahensya kun may makita nga presensya sang amo nga peste.*
[sibwp_form id=1]