Gina paabot nga sa mas madali nga panahon ma release na ang P45 million nga balor sang bulig gikan sa Presidential Assistance Fund para sa anum ka mga banwa kag siudad nga apektado sang bagyo Tino.
Suno kay Office of the Civil Defense Negros Island Regional Director, Donato Sermeno, III, wala sang timeline, pero gina paabot nga ang pondo ma release as soon as possible.
Sa report sang OCD, may 67,409 ka indibidual nga naga pabilin sa mga evacuation center as of 6pm sang November 12, may 139,988 naman ang yara sagwa sang mga evacuation center.
Masobra sa 53,000 ka mga balay ang nagkalaguba. 44,312 ang partially damaged sa Negros Occidental, isa sa Negros Oriental kag 9,339 naman ang destroyed nga mga puluy-an sa Negros Occidental.
Suno kay Sermeno, 68 pa ang missing kag padayon ang search and retrieval operation.
“Ang effort sa search and rescue, so ang isa sa naistoryahan namon didto, kun kis-a ang pamilya bala indi gid makuntento, pasakyon naton sa water assets para mag upod sa operation, at least makita niya nga may gina obra man ang aton gobyerno. 68 pa aton missing”, suno kay Sermeno.*