Nag record na sang una nga Covid-19 fatality ang Negros Occidental Police Provincial Office matapos mapatay sang Sabado ang isa pulis sa probinsya bangud sang Covid-19.
Ini ang ginkumpirma ni police Lt Abegael Donasco, spokesperson sang NOCPPO.
Ang napatay nga pulis amo si Police Staff Sargeant Samson Fabela nga na assign sa Sipalay City PNP.
Suno kay Donasco naglain ang pamatyag sang pulis sang Hunyo 18 kag pag kasunod nga adlaw siya ang nagpaidalom sa swab test kag nag positibo sa Covid-19.
Matapos ang duha ka adlaw, gin budlayan sa pag ginhawa si Fabela kag sang Sabado, Hunyo 26, napatay ini sa hospital.
Wala pa nahibaluan suno kay Donasco kun sa diin nakuha sang pulis ang virus. Nag isolate naman ang iya sini nga mga close contacts nga pulis.
Sa pinaka ulihi nga datos sang NOCPPO, nag lab-ot na sa 177 ang total Covid-19 cases sa ka pulisan sa probinsya kag 34 ang active cases sa karon.