Nabun-an sang makapila ka beses kag napatay si Police Master Sergeant Davy Carampatana, isa ka intelligence operative matapos nga nagbato ang subject sa ginpatigayon nga buy-bust sa Sitio Talaptap, Barangay Talaptap sa banwa sang La Castellana, Lunes sang gab-i.
Ang iloy sang suspek ang nagkuha man sang patalom kag nagbulig buno sa mga pulis, rason nga napilasan ang deputy chief sang La Castellana PNP nga si Capt. Jose Michael Muñez kag si Corporal Gerson Guache.
Ang Police Regional Office-Negros Island Region subong nga Martes, Mayo 12 ang naghatag sang Medalya ng Sugatang Magiting kay Muñez kag Guache.
Ang subject nga ginkilala kay alias Edward, 41-anyos, ang natiruhan sang pulis kag karon confined sa La Castellana Rural Health Unit.
Detained naman sa La Castellana PNP ang iloy ni Edward nga si Delia, 68-anyos.
Narekober sa buy-bust ang suspected shabu nga nagabalor P47,600, drugs paraphernalia kag ang mga kutsilyo nga gingamit sang mag-iloy sa pagbuno sa mga operatiba.
Ginsiling ni Police Major Romulo Gepilango, hepe sang La Castellana PNP, kaso nga murder kag pagsupak sa Republic Act 9165 ukon Comprehensive Dangerous Drugs Act of 2002 ang ipasaka batok kay Edward.
Samtang, kaso nga frustrated murder ang paga-atubangon ni Delia.
Suno kay Gepilango, si Edward ang ginatudlo suspek sa pila ka mga kaso nga robbery, gun-for-hire activities kag naga-supply sang droga sa 4th kag 5th District.
Ikaduha na ini nga beses nga may napatay nga pulis sa buy-bust operation sa Negros sini nga tuig.*
[sibwp_form id=1]