Ginbawian sang kabuhi ang isa ka pulis sang mabunggo ang iya nga motor sa isa ka truck sa atubang sang Angels Memorial Park sa Guanzon Street, Barangay 1 sa Kabankalan City, Domingo sang kaagahon.
Ang nagtaliwan ginkilala kay Patrolman July Pataytay, 32-anyos, miyembro sang Philippine National Police-Maritime Group kag residente siya sang Brgy. Puso sa La Castellana.
Ginamaneho sang pulis ang iya motorsiklo halin sa proper sang Kabankalan kag magapadulong kuntani sa Maritime Police sub-station sa Brgy. Daan Banua.
Nag-gwa sa imbestigasyon sang kapulisan nga nasaga-id sang pulis ang steel railing sa likod sang naga-parking nga close van nga truck, rason nga natumba ang pulis sa dalan.
Naga-pondo sa higad sang highway ang truck kag naka-on ang hazard lights apang wala sang early warning device. Gindala sa police station ang driver sang truck.*