Kasunod sang kaso sang suspected glanders disease sa probinsya sang Siquijor, publiko ang gina abisuhan nga mag palayo sa mga naga masakit nga kasapatan.
Ginklaro ni Provincial Health Officer, Dr Girlie Pinongan nga ang kaso sa Siquijor kun sa diin may mga nagmasakit matapos mag kaon sang karne sang carabao nga gina suspetsuhan may glanders disease ang pending validation pa.
Ginahulat pa ang resulta nga maga pat-od kun bala glanders disease gid man ang amo nga kaso.
Ang glanders disease ang isa ka zoonotic disease ukon masakit sa kasapatan nga gina tuga sang bacteria.
Sarang ini makalaton sa tawo paagi sa droplets. Tumalagsahon naman ang human to human transmission.
Sa gihapon, gina abisuhan ang publiko nga mag palayo sa mga kasapatan nga naga masakit.
Ang glanders masami naga apekto sa mga kabayo suno kay Pinongan kasubong man carabao kag kanding.
“Actually naghatag lang to ang DOH sang guidelines – kun paano ang treatment, ano nga mga medication, antibiotics man lang. And depende sa sintomas nga na ano sang pasyente. So gina warn lang ang public nga kun may naga masakit nga kasapatan indi lang anay mag palapit”, suno kay Pinongan.