60 anyos nga principal ang yara karon sa critical nga kondisyon matapos nga mahulog sa atop sang building sang ila nga eskwelhan.
Gina bulong karon sa ospital sa Bacolod bangud sang malubha nga kahimtangan si Reynaldo Mojares, Principal 1 sang Guinpana-an Elementary School sa Moises Padilla.
Suno kay Ian Arnold Arnaez ang spokesperson sang DepEd Negros Occidental Division Domingo, Hulyo 28 nagbalik sa eskwelahan si Mojares mahimo may angut sa last minute preparation para sa pagbukas sang klase kaupod ang pila ka mga manunudlo kag iya asawa nga isa man ka maestra.
Nakapauli na si Mojares kag pagbalik sini mga las cinco sang hapon sa eskwelahan suno kay Arnaez mahimo nakita niya ang mga dahon sa atop.
Nagsaka ini sa atop gamit ang hagdanan.
Ugaling pag panaog kay wala man sang may nagakapot sa hagdanan nag slide ini nga gintunaan sang pagkahulog sang principal.
Nag agum siya sang malubha nga samad sa ulo. Suno kay Arnaez tigayon man naghatag ang mga kaupod niya sa DepEd sang personal nga bulig.
Manug retire na si Mojares sa serbisyo suno kay Arnaez.