Ginpahayag ni Police Lt. Col. Anthony Grande, hepe sang Himamaylan PNP nga may yara na sila sang lead sa pagluthang-patay sa isa ka broker sang kasapatan sa gwa sang bulangan sa Barangay Carabalan, syudad sang Himamaylan, Negros Occidental, Martes sang hapon.
Base sa imbestigasyon, una nga adlaw sang bulang sa lugar gani nagbulang ang biktima nga si alyas Jesmar, 36-anyos, apang sang siya ang yara na sa gwa sang bulangan, nagpalapit ang isa ka suspek kag gintiro siya sa liog.
Sang natumba ang biktima sa duta, liwat siya nga gintiro sa ulo sang makaduha ka beses sang isa pa gid ka suspek.
Gilayon nga naglakat ang mga suspek, samtang gindala naman ang biktima sa Governor Valeriano M. Gatuslao Memorial Hospital apang siya ang gindeklarar nga dead on arrival.
Narekober sa crime scene ang duha ka basiyo sang caliber 9mm pistol kag isa ka basiyo sang kalibre 45 nga pistola.
Personal grudge ang isa sa mga motibo nga gina-usoy sang kapulisan.