Mabunok nga ulan ang nagtupa sa pila ka bahin sang Negros Occidental. Sa 12 pm nga report sang Provincial Disaster Risk Reduction and Management Council, may 232 ka mga pamilya ukon 655 ka persona ang apektado sang mabunok nga ulan.
Suno kay Irene Bel Plotena, ang pamuno sang PDRRRMO, nalakip sa mga banwa kag siudad nga may mabunok nga ulan kag pagbaha amo ang San Enrique, Pontevedra, Valladolid, Bago City, Sipalay, La Carlota City kag Isabela.
Suno sa PDRRMO may 157 ka pamilya ukon 370 ka persona ang yara sa mga evacuation center, may 14 naman ka pamilya nga nag evacuate ang yara sa gwa sang evacuation center.
Sa La Carlota City may mga gindala sa regional evacuation center bangud sang mabunok nga ulan.
Sa Isabela naman may pre-emptive evacuation sa Sito Alegria, Brgy 5.
Suno kay Plotena ang mabunok nga pag tupa sang ulan dala sang southwest monsoon nga mas ginpabaskog sang bagyo Bebinca.
Gina abisuhan ang publiko nga mag aligmat bangud sang malain nga panahon.