Masobra na sa 75 percent sa target nga mabakunahan sang Negros Occidental ang fully vaccinated.
Samtang, PinasLakas Campaign ang ginlunsar sang DOH Region 6 kaina nga naga tuyo lambot sang dugang nga target mabakunahan.
Sa July 24 nga datus sang Department of Health, 75.88 percent na ang fully vaccinated sa Negros Occidental. Sa mga yara naman sa A2 category ukon sa mga senior citizen, 59.81 percent ang fully vaccinated.
Humalin sang ginpatuman ang covid vaccination sa Western Visayas sang March 2021, 5,188,247 ukon 80 percent na sa target general population ang fully vaccinated.
Ini suno kay Dr Sophia Pulmones sang DOH6 sa iya nga mensahe sa PinasLakas Campaign Launch kag booster vaccination sa Iloilo. Pero suno sa iya kinahanglan pa gid nga lab-uton ang yara sa A2 category.
Sa karon sa ila nga datus, 76.81 percent ukon 564,663 sa 735,157 nga nga senior citizen ang fully vaccinated. Mahinay karon suno sa iya ang pagpabakuna sa mga senior citizen, kag sa booster shots naman subong ang pinaka manubo nga pag idog humalin sang pagsugod sang vaccination campaign. Ang booster coverage naman sa region 6 yara lamang sa 12.16 percent.
Ini ang rason suno sa kay Pulmones sa liwat nga pag dusos ang covid 19 vaccination para malambot ang 90 percent sang primary series coverage sa mga senior citizen kag 50 percent naman para sa first booster dose sa general population sa nahauna nga 100 days sang Marcos Administration.
Nagakasayuran nga 97,000 pa ka mga senior citizen sa bilog nga rehiyon ang dapat mahatagan sang primary series vaccines ukon madapatan sang first dose kag masobra naman sa 1.6 million ang due sa ila nga booster dose.