Nagdamo ang seismic activity ukon pagtay-og sa Kanlaon Volcano gani nagpagwa sang notice ang PHIVOLCS subong nga adlaw Buot silingon nagdamo ang underground earthquakes sa bulkan Kanlaon nga nag dangat sa 35 tanan humalin las 10 kagab-i tubtob las 9 sang aga kaina.
Suno kay Engr. Marie-Andylene Quintia, resident volcanologist sang PHIVOLCS sa Negros Occidental, tectonic ang mga paglinog pero indi mabatyagan sa mga lugar sa palibot sang bulkan ang mga tay-og. Mga 12-15 kilometers ang kadalumon sang origin sang linog.
Dugang pa niya nga dapat mas mangin alerto ang publiko gani nagpagwa sila sang notice nga naga pahibalo sa tanan sa pagdamo sang pagtay-og sa idalom sang bulkan.
Wala man kuno naga kinahanglan nga ipasaka sa Alert Level 2 ang bulkan Kanlaon kay wala man sang pagbag-o sa iban nga volcanic parameters magluwas na lang gid sa pagdamo sang pagtay-og.
Ang Kanlaon nagapabilin sa Alert Level 1. Ang publiko ang gina abisuhan nga estrikto nga sundon ang 4 kilometer Permanent Danger Zone bangud posible ang gulpi lang nga hazardous phreatic eruptions.
Indi man pwede maka labay malapit sa crater sang bulkan ang mga eroplano. Padayon ang pagbantay sang PHIVOLCS sa mga aktibidad sang bulkan.