Halin sa pagdamo sang sulfur dioxide nga gina buga sang Bulkan Kanlaon, mga pagtay-og naman sa sulod sang bulkan ang nagdamo.
Ang Philippine Institute of Volcanology ang Seismology ang naga paandam nga mahimo magresulta ini sa paglupok sang bulkan.
Kaina sang aga sang nagpagwa sang advisory ang PHIVOLCS sang hinali nga pagdamo sang volcano tectonic quakes ukon pagtay-og nga na monitor sa bulkan Kanlaon nga naglab-ot sa 64.
Yara sa duha tubtob walo ka kilometro ang kadalumon sang ginhalinan sang pagtay-og sa western section sang bulkan.
Ang ini nga mga pagtay-og suno sa advisory sang PHIVOLS ang tuga sang pagkabuka sang mga bato bangud sang pagsaka sang magma nga naga pangita sang alagyan pasaka sa surface sang bulkan.
Sang kahapon, Miyerkules, yara sa 7,087 ka tonelada ang ginbuga nga sulfur dioxide sang bulkan. Sang Lunes nagsaka ini sa masobra 10,000 ka tonelada.
Antes sang June 3 nga eruption sang Kanlaon yara lang sa masobra sa 1,000 ka mga tonelada.
Pagkatapos sang paglupok, nag average naman ini sa masobra sa 4,000 ka tonelada.
Suno sa kay Mari-Andylene Quintia, resident volcanologist sang Kanlaon Observatory sa La Carlota, mga patimaan ini sang posibilidad sang paglupok sang bulkan.
Ini man ang rason nga nagpagwa sila sang advisory para mapahibalo ang mga pumuluyo.
“Pwede ni siya naton ma take into an eruption so siyempre amo na nga very clear kita sa amo ni nga advisory kay medyo kaina sang aga medyo nagdamo ang aton number of earthquakes nga na record. (Which will lead into an eruption?) Yes ma’am.”, suno kay Quintia.