Pamuno sang Philippine Institute of Volcanology and Seismology naga panugyan sa publiko labi na sa mga pumuluyo nga sakop sang mga lugar nga apektado sang bulkan Kanlaon nga mag pabilin nga mabinantayon.
Importante suno kay Director Teresito Bacolocol nga mag sunod sa abiso nga gina pagwa sang PHIVOLCS kasubong man sang LGU.
Paathag niya, maid-id man ang monitoring sa bulkan Kanlaon pero wala sang may maka pat-od kun maga lupok ukon san-o magalupok ini.
Sa karon ang mga parameters ukon balasehan sang kondisyon sang bulkan nagapabilin sa Alert Level 3.
May padayon nga naga ka record nga volcanic earthquakes, sulfur dioxide flux, plume kag ground deformation.
Paathag ni Bacolcol mapasaka sa Alert Level 4 kun ang volcanic quakes sunod-sunod nga naga ka record, ang inflation sang bulkan ma record sang nga instruments sini, sa karon yara lamang ang inflation sa eastern side, pero ang padayon nga inflation ang rason man nga indi mapapanaog sa Alert Level 2 ang bulkan.
Importante suno kay Bacolcol sa karon nga ang 6km danger zone istrikto nga gina patuman kay kun may paglupok man nga matabo sarang malikawan ang tuman nga kahalitan kag maka-evacuate pa.
Kaina sang aga nagpatigayon sang Infopress ang PHIVOLCS sa katapo sang media kag mga information officer agudto mahangpan sang tul-id ang Kanlaon Volcano hazards.