Gindagdagan sang show cause order ang apat ka personnel sang Supply and Property Section sang City Engineer’s Office matapos madiskubrehan ni Mayor Greg Gasataya ang may kapin sa 4,800 ka sako sang semento ang nagtig-a na.
Gintagaan sila sang 24 oras para magsabat.
Suno kay Gasataya, tinluan sang siudad ang amo nga opisina nga amo ang naga bantay sa pagsulod kag pagwa sang construction materials nga gina bakal sang siudad para sa mga projects.
Ginmando sang alkalde ang pagpangita sang lugar nga sayluhan sang nabilin pa nga mga stocks para athag kun pila pa ang bilin nga mapuslan pa.
Ginapangayuan man sang alkalde sang report ang CEO para sa status sang mga projects nga ginapatuman sang administrasyon.
May nabaton nga report si Mayor Gasataya nga may mga proyekto nga sang 2022 pa ginsuguran apang wala pa natapos tubtob subong.
Sabado sang nadiskubrehan sang alkalde ang nagtig-a nga semento sa ginpatigayon nga inspeksyon.