Philippine College of Physicians – Negros Occidental Chapter ang naga pahalong sa publiko kag indi mag kampante karon nga malala suno sa ila ang pagsaka sang kadamuon sang naga apektuhan sang Covid – 19.
Suno kay Dr Ronel Sario, ang Presidente sang PCP – Negros Occidental, sa ila nga datus indi magnubo sa napulo ang naga kapatay sa kada adlaw sa Bcolod kag Negros Occidental bangud sang Covid-19.
93 percent sa mga nagtaliwan ang wala nabakunahan suno sa grupo. Kun sang bulan sang Abril na record ang pinaka mataas nga kaso sang Covid – 19, ang sitwasyon subong indi mag layo, kag kun padayon nga mag kampante ang pumluyo mas maga lala pa gid ang sitwasyon.
Puno ang mga ospital bangud kalabanan subong critical ukon severe cases, nagalab-ot sa 85 ka pasyente ang yara sa waiting list sang isa ka ospital suno kay Sario.
Dugang pa niya, pinamilya na ang infected. Kuntani ang tagsa- tagsa maga butang sang iya kaugalingon sa ECQ mode ukon ang pinaka mataas nga community quarantine classification. Indi naman abi sa sitwasyon sang ekonomiya subong, masarangan pa ang mga lockdown.
May panawagan man ang mga duktor sang estrikto nga pag patuman sang health protocols, bisan pa sang curfew. Dapat mangin agresibo kag pro-active ang pagpatuman sini.
“Health protocol gid. Kag ang gathering. Kay makita naton sa social media damo gyapon gatipon-tipon. Ga birthday celebration may naga lagaw-lagaw, may ga pangape kape. Mindset na lang gid ka tawo mismo mahambal nga daw lockdown mindset. ECQ mindset amo na akon mahambal. Kay kun ga sige lang kita nga daw sa wala lang, madamo nga madamo. Kag ang amon man gusto tani is ang implementation sang mga ordinances ta bala daw ka indi ta makita,” suno kay Sario.