Magaabot sa Bacolod City si President Ferdinand Marcos Jr. para sa paglunsar sang Oplan Kontra Baha nga isa ka daku nga inisyatibo nga nagatuyo nga magapabaskog sang flood mitigation kag disaster preparedness sang siudad.
Ini ang ginpahayag ni DPWH Undersecretary Charles Calima sa DPWH–LGU alignment meeting nga ginpatigayon sa Bacolod City Government Center Miyerkules sang aga.
Yara sa meeting si Bacolod Lone District Rep. Abelardo “Albee” Benitez kag Mayor Greg Gasataya.
Ginpabutyag sang duha ka opisyales ang importansya sang pagtinlo sa drainage systems, pagpalapad sang creek kag river channels, kag pagpatuman sang dredging kag clearing operations sa mga kritikal nga lugar.
Ang nasambit nga meeting ginpatigayon kasunod sang pagbaha nga natabo kahapon sa Bacolod City tuga sang tropical depression Verbena, nga nagresulta sa pag-awas sang tubig sa madamo nga lugar kag nagpa-evacuate sang pila ka mga residente.
Una dapat kuntani Biyernes nga adlaw maabot ang president pero naidog ang schedule.
December 5 naman ang masunod niya nga schedule.*