Pamuno sang Bacolod City Police Office ang nagpaandam sa mga kabarangayan nga indi sila magduha- duha manakop kun may ginapatigayon nga perya kag pabulang sa Bacolod.
Ginmando na ni Mayor Albee Benitez ang moratorium pending sang review sa pagsulundan sa issuance sang special permit sa pabulang kag perya sa mga fiesta sa barangay.
Paandam ni BCPO officer in-charge Colonel Noel Aliño bisan sa mga opisyales sang barangay nga indi sila magduha-duha nga manakop kag pasakaan sila sang kaso angut sa pagsupak sang Presidential Decree 1602 kag 449 may kaangtanan sa illegal gambling kag cockfighting law.
Suno sa iya dumilian ang dapat nga ginadumilian.
Nanindugan si Councilor Al Victor Espino nga legal ang paghatag sang permit sa mga pabulang kag perya sa mga kabarangayan kun may mga okasyon sandig sa City Ordinance 506.
Ginsiling naman ni Aliño nga may nakasugtan sila sang siudad kag nagahinyo siya sang kooperasyon agud mapabaskog pa ang kampanya kontra illegal gambling.
Ini bangud nagapati siya nga ginagamit sang mga promotor sang sugal ang perya kag pabulang sa iligal nga aktibidad.