Matapos nga gin-anunsyo sa launching sang ika 47 nga MassKara Festival nga sa dalan sang SM City Bacolod nga pagahiwaton ang Arena Dance Competition pila sa mga netizens ang nagpabutyag man sang ila sentemiento online.
Iban ang nagakahangawa nga basi magbaha ang dalan, hinali nga mag-ulan sa tion sang kompetisyon.
Apang, ginklaro ni Bacolod City Mayor Greg Gasataya nga naglabay sa maid-id nga pagtuon sang Bacolod Gugma Foundation Inc. ang pagsaylo sang venue.
Suno sa iya, madugay na nga ginahandaan sang foundation ang ika 47 nga MassKara Festival kag indi man sila mag recommend sa siudad kun delikado.
Ginpakaamayo sang foundation nga indi na paghiwaton sa Paglaum Sports Complex ang Arena Dance sini nga tuig bangud posibli nga marusdak ini kun magdamo ang tawo.
Dugang ni Gasataya, indi man sarang nga ma-accommodate sang public plaza ang mga tumalan-aw, rason nga mas nagaka angay para sa competition ang amo nga dalan sa SM City Bacolod.
Magabutang sang mga bleachers ang foundation sa kilid sang dalan para sa mga tumalan-aw, apang sa public plaza naman pagahiwaton ang awarding ceremony.
Magapabilin man nga sa dalan Araneta ang tuigan na nga Street Dance Competition.
Oktubre 17, magasambuwa ang pito ka elementary schools kag apat ka high schools sa tagsa nila ka category samtang sa Oktubre 18 naman ang walo ka barangay sa Barangay Category.
[sibwp_form id=1]