Nagpapanaog sang isa ka memorandum ang Bacolod City Administrator’s Office agud istriktohon ang pagpatuman sang mga pagsulundan para sa katawhayan sang Bacolod City Public Plaza.
Suno kay City Administrator Atty. Mark Steven Mayo, ginhatagan sang direktiba ang City Legal Office, Public Order and Safety Office, Department of Social Services and Development, kag Bacolod City Police Office nga sawayon kag pahalinon ang mga kutob nagatinulog sa plaza.
Ang mga nasaway na kag nagabalik sa gihapon, ang dakpon na sang kapulisan kag kon matukiban nga may mga krimen ini nga nahimo, siudad na mismo ang mapasaka sang kaso.
Sandig sa direktiba sang siudad, ginadumilian na ang pagtulog, paglakat nga nagauba, pagpatukod sang mga tululugan, kag pag panigarilyo sa palibot kag sulod sang plaza.
Ini matapos nga may isa ka insidente nga natabo sa plaza sang nagliligad nga inadlaw kon sa diin, isa ka babaye ang ginapatihan nga gin-hold up udtong adlaw.
Dugang ni Mayo, may mga CCTV man sa gwa sang plaza apang may mga lugar nga indi malab-ot sini rason nga ang gin-report nga hold-up incident ang wala nakuhaan sang CCTV footage.
Ginmanduan man sini ang mga private security guards nga gin-deploy sang siudad nga kon may mga suspicious activities sa plaza, aksyonan na gilayon agud matapna ang posible nga krimen.
Ginapaabot nga matapos sang TIEZA ang renovation sang plaza sa bulan sang Setyembre sini nga tuig.
[sibwp_form id=1]