Ang pagtukod sang dugang nga mga micro-hydro powerplant, solar power installation project kag pila pa ka mga ginakabig distributed energy resource ang pila lang sa mga gina-recommend sang Provincial Power Sector Study Group kag Negrosanon Initiative for Climate and the Environment para malab-ot ang ginahandum nga 100percent transition sa renewable energy.
Gani sa ginpatigayon nga Provincial Energy Summit and LGU Forum upod sa Department of Energy kag University of St. La Salle, nanawagan si Governor Eugenio Jose Lacson para sa pag-ugyon sang government kag private sector para mas mapadasig ang tikang sa pagpatuman sang SecuRE Negros Roadmap nga amo ang Energy Sector Development Strategy and Action Plan sang probinsiya.
Tuyo sini nga maangkon sang probinsya ang Reliable, Renewable, Accessible, Affordable, Available and Sustainable Energy sa 2030. Ini man ang labi nga ginapaabot ni Energy Under Secretary Felix William Fuentebella.
Isa man ka Covenant of Commitment signing ang ginpatigayon upod sa mga stakeholders nalakip diri ang pamunuan sang DOE, Negros Electric and Power Corporation, Metro Bacolod Chamber of Commerce and Industry kag tiglawas sang nagkalain-lain nga sector.