Clearing operation sa mga merkado kag pagbantay sa iban pa nga lugar nga masami ginateniran sang mga sidewalk vendors ginatugyan na sang siudad sa mga kabarangayan.
Natapos na sang City Legal Office Enforcement Team ang pagpahalin sa mga sidewalk vendors sa Amelia kag Mercedes Street sa Libertad Market.
Suno kay City Legal Officer Romeo Carlos Ting, Jr., madasun nga limpyohan sang enforcement team ang Central kag Burgos Public Market sa pagpatuman sang zero tolerance batuk sa illegal nga pagbaligya sa dalan.
Agud nga mapabilin nga hilway ang dalan sa mga sidewalk vendors kag iban pa nga illegal structures ginatugyan sang siudad ang responsibilidad sa mga kabarangayan sa pag comply sa pagsulundan sang Department of the Interior and Local Government.
Samtang, may 193 naman ka mga sidewalk vendors ang na-validate na sang Local Market Committee kag amo lamang ang sarang pahanugutan makabaligya sa mga designated areas sang siudad sandig man sa natukod nga ordinansa.