Pagdugang sang magabyahe nga jeep magadepende sa resulta sang simulation exercise sa ginapatuman nga Local Public Transport Route Plan ukon LPTRP.
Nangin madiutay lang nga mga depasahero nga jeep ang nakigbahin sa una nga adlaw sang simulation exercise para sa rota nga gintalana sa LPTRP sang Domingo.
Suno kay Atty. Salvador Altura, spokesperson sang LTFRB Western Visayas, may mga modernized jeepney nga wala anay nagbyahe.
May mga traditional jeepney man nga wala pa sang extended provisional authority nga wala nag-upod sa simex.
Sa tatlo ka adlaw nga simex mapat-ud kun kinahanglan sang siudad nga magdugang sang public utility vehicle para masabat ang kinahanglan sang mga pasahero sa gintalana nga 24 ka mga rota.
May 72 ka mga surveyors halin sa non-government organization ang gintalana para mahibaluan ang kahimtangan sang transport service dungan sa ginapatuman nga public utility modernization program.
Ginalauman naman ni City Administrator Pacifico Maghari, III, nga malakip sa pagtuon ang daily income sang modernized jeepney kag traditional jeepney agud man makadihon sang balanse nga tikang ang siudad para man mapaiway ang masami pagbangigay kag insidente sang inagaway sang pasahero.