Ang paghimu sang online candidate profile dashboard nangin kabahin sang mga tikang sang Vote Pilipinas agud mas mapahibalo ang mga botante angut sa mga nagakandidato para sa May 9 national kag local elections.
Pero suno kay Jaja Valencia, project coordinator sang Voter’s Education Advocacy Group, nagapabilin sa gihapon nga dako nga pagpanghangkat para sa ila ang disinformation nga nagalapta ilabi na sa social media.
Sa kalapad kag kadamo na karon sang social media platforms,influencers kag bisan vloggers mabudlay mapunggan ang mga fake news nga masami gina palapta man sang mga netizens.
Bilang voter’s information campaign partner sang Comelec, ang Vote Pilipinas ang nagapabaskog man sang tikang kontra vote buying sa ila mga caravan.
Kaupod man sila sang Comelec sa mga Vote Counting Machine Roadshow sa tuyo nga mapalapad pa gid ang ihibalo sang mga botante angut sa natalana nga automated May 9 elections.