Ginahandum nga pag-gamit sang renewable energy ginalauman nga malab-ot ni Mayor Albee Benitez sa madason nga tuig matapos ang plebisito pabor sa joint venture agreement.
Deklarasyon na lamang nga m ga gikan sa National Electrification Administration ang ginahulat sang pamunuan sang CENECO kag Primelectric Holdings Incorporated agud nga maaprobahan ang kadalag-an sang joint venture agreement matapos man nga nangibabaw ang yes votes sang member-consumers para sa kasugtanan.
Ginapaabot naman ni Mayor Benitez ang mas maayo nga serbisyo para sa kunsomedor karon nga natapos na ang plebisito pabor sa JVA sang Ceneco kag Primelectric.
Ginalauman sang alkalde sa madason nga tuig malab-ot man ang handum nga mangin renewable energy reliant ang siudad.
Kabahin sa mga ginpasalig sang Ceneco kag Primelectric sa alkalde amo ang masolusyunan ang problema sa masami brownout, mataas nga presyo sang kuryente kag paggamit sang renewable energy kasubong sang pagkuha sang supply gikan sa solar power kag geothermal plant sa probinsya.
Sa pagsapol sang pamunuan sang Primelectric kay Benitez ila man ginapasiguro nga mangin hilway ang natalana nga transition para sa ikaayo sang mga kunsomedor.