Temporaryo nga ginsirad-an sang siudad sang Bacolod ang half lane sang dalan Lopez Jaena matapos nga narumpag ang pader sang Burgos Cemetery bangud sa mabunok nga ulan Sabado sang gab-i.
Ginsiling ni City Administrator Atty. Mark Steven Mayo nga magapatuman anay sang temporary repair ang siudad sa amo nga porsyon sang patyo samtang indi pa masugudan ang plano nga rehabilitation sini.
Sang nag-igo ang Bagyong Tino sa Bacolod City, natumbahan sang dako nga puno ang amo nga bahin sang patyo, rason sang pagkaguba sini.
Bangud nga nagahilay na ang amo nga pader kag indi na reliable ang structural integrity sini suno sa City Engineer’s Office, sang pagbunok sang ulan sang Sabado narumpag ini liwat.
Suno kay Mayo, may kapin sa 10 ka mga pantyon ang naguba sang pagrumpag sang Sabado.
Ginapadali na sang siudad ang plano nga pag-rehabilitate sang amo nga bahin sang patyo.
Padayon ang information dissemination sang siudad sa mga himata sang masobra 450 ka mga patay nga nahamtang mismo sa naguba nga pader sang Burgos Cemetery sang plano sang siudad nga kuhaon kag isaylo sa bone vault sa Barangay Handumanan.
Dugang ni Mayo, nasugudan na sang siudad ang paghikot sang mga papeles sa pagpatuman sang rehabilitation sang amo nga pader sa patyo.
Kun indi na gid makontak sang siudad ang mga himata sang mga natungdan nga minatay, maga-publish nalang sang notisya ang siudad sa mga local newspapers agud masugudan na ang pag-kay-o sang amo nga porsyon sang patyo.
“Actually, kun ang sa naguba (bangud sa mabunok nga ulan) daw mga less than 10. Galing kay syempre maapektohan ang piyak kay ang foundation sang pader, daw indi na amo na ka reliable. That’s why mag inventory ka sina, indi lang siling ang naguba but eventually ato man ang may very high probability nga ma collapse man eventually”, suno kay Mayo.
[sibwp_form id=1]