Kabahin sang malapit P10B nga budget proposal sang Sugar Regulatory Administration ang small-scale solar powered water irrigation system nga ginapaabot matigayon sa madasun nga tuig.
Ginsiling ni SRA administrator Pablo Luis Azcona nga plano nila nga ipain ang P8B para sa irrigation system agud nga masolusyunan ang epekto sang El Nino phenomenon sa mga katubuhan sa pungsod, ilabi na sa isla sang Negros.
Kabahin sang nabilin nga kapin P2B nga proposed budget ang ipain sa soil rejuvenation program para sa mga katubuhan sa Luzon, labi na sa Batangas kag Tarlac nga makabig highly acidic ang duta.
Ginatan-aw sang pamunuan sang SRA nga paagi sa three-year program madugangan ang sugar production sang 180,000 metric tons sa tuyo nga indi na kinahanglan pa sang pungsod ang mag-import sang kalamay.
Sa record sang SRA indi magnubo sa 10 percent ang tuigan nga gin-nubo sa sugar production tuga sang mainit nga panahon sang nagliligad nga mga tinuig.
Dungan sa ginapatuman nga programa sang SRA ang pagpabaskog sang research and development para sa panibag-o nga mga variety sang tubo nga sarang makaluwas sa init kag bisan pa sa pagsalakay sang peste.