Nagdangat sa kapin P5.4M nga balor sang suspected shabu ang na recover kay Rene Lapera, Jr., alias Ombap, 26-anyos sa Purok Villa Lourdes, Barangay Pahanocoy sa Bacolod City kahapon.
Ang buy-bust operation ang joint operation sang Police Station 8 kag Special Operations Unit-6 Provincial Drug Enforcement Group-6.
Nakuha sa kay Lapera nga ginakabig man high value individual ang pito tanan ka putos kag 11 ka plastic sachet, lakip na ang buy-bust item nga naga unod sang suspected shabu, P3,000 nga buy-bust item, isa ka digital weighing scale kag isa ka sling bag.
Sa kabug-usan, yara sa 800 grams kag may estimated value nga P5,440,000 ang nakuha nga suspected shabu sa suspetsado.
Samtang, padayon naman sa karon ang imbestigasyon sang kapulisan agud matumod kun diin gid bala nagahalin ang ini nga mga iligal nga droga.
Pasakaan si Lapera sang kaso nga paghupot kag pagbaligya sang iligal nga droga.