Handa si Silay City Mayor Joedith Gallego nga ihatag ang P25,000 nga reward money sa impormante nga nagbulig sa National Bureau of Investigation agud maaresto ang mga persona nga naga uyat sang ginkawat nga painting sang National Artist nga si Fernando Amorsolo sa Hofilena museum sa Silay.
Ang amo nga kantidad ang gintalana sang alkalde halin sa iya kaugalingon nga kwarta, sa tuyo nga mapadasig ang paglubad sa kaso kag pagbalik sang painting sa Hofileña Museum Silay.
Hulyo 11 naaresto sa entrapment operation sa Quezon City sanday Ritz Chona Ching Castro kag Donecio Somaylo Escobia nga amo kuntani ang maga-deliver sang “Mango Harvesters,” painting sa manugbakal sa balor nga P3.5 million pesos.
Ang ginbaligyaan sang painting ang nakig angut sa ABS-CBN news kag nanugid nga sa iya gintanyag sang isa ka abogado ang amo nga painting gani gilayon nga ginplano ang isa ka entrapment operation.
Ang duha ka suspek pasakaan sang kaso nga pagsupak sa Anti Fencing Law.
Gin usisa pa karon sang NBI ang partisipasyon sang abogado sa natabo nga krimen.
Nagapabilin ang painting sa custody sang National Museum.