Aprubado na sang Sangguniang Panlungsod ang social pension ordinance agud nga mabuligan ang kapin dose mil ka mga indigent senior citizen kag persons with disability sa Bacolod.
Suno kay Councilor Celia Flor, pamuno sang Committee on Senior Citizens sang konseho, sa idalom sang ordinansa sarang magbaton sang tig-500 pesos nga social pension kada bulan ang mga benepisyaryo nga wala sang ginabaton nga ayuda ukon manubo lang sa P5,000 ang bulanan nga pension halin sa SSS ukon GSIS.
Pero kinahanglan nga residente sang siudad ang benepisyaryo sa sulod sang indi magnubo sa isa ka tuig.
Ang italana nga pondo ang manggikan sa budget sang City Mayor’s Office para sa madasun nga tuig.
Sa karon padayon ang ginahimu nga validation sa kabarangayan kag updating sang database sang senior citizens.