Nakarekober ang kapulisan sang 220 grams ukon P1,496,000 nga balor sang ginasuspetsuhan shabu kag granada gikan sa rider nga nagtinguha kuntani nga magpalagyo sa checkpoint .
Ang checkpoint ginpatigayon kagab-i sa dalan San Juan, Barangay 6 sa Bacolod City, sang mga katapo sang Bacolod City Mobile Force Company kag Police Station 2.
Na-intercept sang kapulisan ang rider nga si alyas “Anthony”, sang Brgy. 2 sa Bacolod sakay sa motorsiklo.
Madasig ang pagpadalagan ni “Anthony”, wala siya nakasuksok sang helmet kag wala sang side mirrors ang iya motorsiklo.
Base sa report sang Bacolod City Police Office, bisan nga nadakpan na si “Anthony” sang blocking force sa checkpoint, nagtinguha pa gid siya nga magdalagan apang napunggan.
Samtang naga-kamog, nahulog ang isa ka bundle sang kwarta kag mga pakete sang ginasuspetsuhan shabu.
Nakuha man sa 35-anyos nga rider ang isa ka hand grenade.
Magapangatubang sang kaso nga illegal possession of drugs kag explosive ang gindakup.